چکلے ( عورت کے خود ساختہ تقدس کے ثنا خوانوں کے نام ) ساحر لدھیانوی

پینٹنگز اقبال حسین
انتخاب زوار حسین کامریڈ

شاعری
یہ کوچے یہ نیلام گھر دل کشی کے
یہ لٹتے ہوئے کارواں زندگی کے

کہاں ہیں کہاں ہیں محافظ خودی کے
ثناخوان تقدیس مشرق کہاں ہیں

یہ پر پیچ گلیاں یہ بے خواب بازار
یہ گمنام راہی یہ سکوں کی جھنکار
یہ عصمت کے سودے یہ سودوں پہ تکرار

                                                               Iqbal Hussain Paintings

ثناخوان تقدیس مشرق کہاں ہیں
تعفن سے پر نیم روشن یہ گلیاں

یہ مسلی ہوئی ادھ کھلی زرد کلیاں
یہ بکتی ہوئی کھوکھلی رنگ رلیاں

ثناخوان تقدیس مشرق کہاں ہیں
وہ اجلے دریچوں میں پائل کی چھن چھن

تنفس کی الجھن پہ طبلے کی دھن دھن
یہ بے روح کمروں میں کھانسی کی ٹھن ٹھن

Sahir Ludhianvi Poetry Iqbal Hussain Paintings

ثناخوان تقدیس مشرق کہاں ہیں
یہ گونجے ہوئے قہقہے راستوں پر

یہ چاروں طرف بھیڑ سی کھڑکیوں پر
یہ آوازے کھنچتے ہوئے آنچلوں پر

ثناخوان تقدیس مشرق کہاں ہیں
یہ پھولوں کے گجرے یہ پیکوں کے چھینٹے

یہ بیباک نظریں یہ گستاخ فقرے
یہ ڈھلکے بدن اور یہ مدقوق چہرے

Sahir Ludhianvi Poetry
Iqbal Hussain Paintings

ثناخوان تقدیس مشرق کہاں ہیں
یہ بھوکی نگاہیں حسینوں کی جانب

یہ بڑھتے ہوئے ہاتھ سینوں کی جانب
لپکتے ہوئے پاؤں زینوں کی جانب

ثناخوان تقدیس مشرق کہاں ہیں
یہاں پیر بھی آ چکے ہیں جواں بھی

تنو مند بیٹے بھی ابا میاں بھی
یہ بیوی بھی ہے اور بہن بھی ہے ماں بھی

ثناخوان تقدیس مشرق کہاں ہیں
مدد چاہتی ہے یہ حوا کی بیٹی

یشودھا کی ہم جنس رادھا کی بیٹی
پیمبر کی امت زلیخا کی بیٹی

Sahir Ludhianvi Poetry
Iqbal Hussain Paintings

ثناخوان تقدیس مشرق کہاں ہیں
بلاؤ خدایان دیں کو بلاؤ

یہ کوچے یہ گلیاں یہ منظر دکھاؤ
ثناخوان تقدیس مشرق کو لاؤ
ثناخوان تقدیس مشرق کہاں ہیں

اپنا تبصرہ بھیجیں