ساکوں ایویں سنڑ۔۔۔۔!
جیویں کہیں توں نکھڑیا کوئی سنڑدے
ادھ رات کوں غزلاں نصرت دیاں
ساکوں ایویں چنڑ۔۔۔۔۔۔۔!
جیویں دال وچو بہہ چنڑدی ہے
کوئی بڈھڑی ہک ہک کنکر کوں
ساکوں ایویں پنڑ۔۔۔۔۔۔۔۔۔۔۔!
جیویں پتر جوان دی میت تیں
کوئی پنڑدے اپنڑی قسمت کوں
ساکوں ایویں گا……..!
جیویں خان پٹھانے گا گیائیے
میڈا عشق وی توں میڈا یار وی توں
ساکوں ایویں مل۔۔۔۔۔۔۔۔!
جیویں کہیں تالاب دے پانڑی وچ
ملے نکھڑی جوڑی ہنساں دی
ساکوں ایویں منگ۔۔۔۔!
جیویں اندھے اکھیں منگدے ہن
جیویں گونگے صرف آلا منگدن بیا کیا منگدن
ساکوں ایویں رنگ۔۔۔۔۔۔!
جیویں سک دے سکدے سانونڑ کوں
ست رنگی تانگھ دے رنگ رنگن
ساکوں ایویں لکھ۔۔۔۔۔!
جیویں منصف کہیں دی پھاسی لکھ
وت قلم کوں تروڑ سٹیندا ہے
ساکوں ایویں رٹ۔۔۔۔۔۔!
جیویں طوطا رٹے کہیں ناں کوں
جیویں بال رٹیندن قاعدے کوں
ساکوں ایویں رو۔۔۔۔۔!
جیویں کہیں کوں رونونڑ حق بنڑدے
یعقوب رنے جیویں یوسف کوں
ساکوں ایویں جی۔۔۔۔۔!
جیویں پھاسی لگدا شخص کوئی
جیوے آخری رات دے ساہ ساہ کوں
حاتم بلوچ
